فى الوقت اللى معظم الناس هنا تقريبا ملهمش سيرة غير كليب ركبنى المرجيحة او اغنية ديسباسيتو او اهتمامنه كله منصب ف افكار تافهه لا تسمن و لا تغنى من جوع ...
فيه خناقة كبيرة حاصلة ف الناحية التانية من الكوكب بين 2 من عمالقة التكنولوجيا حاليا واللى ممكن تحدد مستقبل البشرية حرفيا حرفيا ...
الخناقة على موضوع الذكاء الاصطناعي .. الطرف الاول هو " ايلون ماسك " و دة صاحب مصانع Tesla ومؤسس paypal وواحد من اكبر المساهمين فى الابحاث المختصة بالذكاء الاصطناعي فى العالم .. والطرف التانى هو الغنى عن التعريف هنا " مارك زوكربيرج " ودة للى ميعرفوش هو مؤسس الفيسبوك وحاليا داخل مجال الذكاء الاصطناعي بقوه كبيرة جدا ..
الخناقة :
ان ايلون ماسك شايف ان نتيجة سرعة تطور الذكاء الاصطناعي اللى شغال عليه البشر حاليا من الممكن جدا انه يؤدى ان الآله توصل لمرحلة انها هى اللى تاخد القرار بدل الانسان ويكون ليها وعى وذكاء عالى جدا بحيث تاخد السلطة وتصنع القرار .. وطبعا دة هايكون خطر عالبشرية جدا لأنها ببساطة ممكن تقرر فناء البشرية ف لحظات لو شافت سلوكهم عدوانى او متناقض او حتى مش بيحقق مصالحها !!
عمنا مارك زوكربيرج بقا شايف العكس تماما وشايف انه تطور الذكاء الاصطناعي بالسرعة الهايلة دى هايدى فرصة اكبر لتطور البشر وهايخلى الافضل هو اللى يستمر وهكذا والموضوع وصل ان مارك وصف ايلون بأنه ضيق الافق !
لغاية هنا دى مجرد زوبعة ف فنجان ومتستاهلش ان سيادتك تشيل الهاند فرى من ودانك وتوقف اغنية ديسباسيتو عشان تعرف الخناقة دى
لكن اللى جاى بقا دة مهم اعتقد ويستاهل يتعرف ،،،
من كام اسبوع كدة حصلت حاجة عجيبة جدا ....
معامل تطوير الذكاء الاصطناعى اللى تبع عمنا مارك كانوا بيحاولوا يطورا الذكاء الاصطناعي على نماذج ربوتات او الات .. بعد ماعلموهم اللغه وطريقة التواصل فيما بينهم .. عشان يشوفوا هايتواصلوا ازاى .. اللى حصل ان الروبوتات بعد فترة قليلة جدا طوروا لغة خاصة بيهم محدش يفهمها غيرهم !!!!!!!!!!!!!
عشان شافوا ان اللغة الجديدة دى اسهل واسرع ف التواصل من الانجليزى وكمان فيها خصوصيه ليهم اكتر !!!!!!!!!!!
انت متخيل يامان .. !!!
اللى سمع فيلم " I Robot " اهو حاجة شبه كدة ،،،
طبعا ممكن حد يسألنى دة ماله ومال مستقبل البشرية .. بص ياسيدي تخيل انت دلوقتى عايش ف عالم فيه سيارات ذاتية القيادة .. اشارات مرور ذاتية التفعيل .. مصانع كاملة شغالة باجهزة فقط بالكومبيوتر .. طيارات بتعتمد عالملاحة الجوية وعلى معلوماتها من هيئات تانية عن طريق النت .. اسلحة عملاقة تحت تصرف الدول العظمى .. موبايلك اللى ف ايدك .. الكاميرا الامامية اللى ممكن تكون بتصور كل احداث حياتك وانت متعرفش .. كل دة ممكن التحكم فيه عن طريق الانترنت .. دى مجرد امثله يعنى
الفكرة ان :
روبوت ذو ذكاء اصطناعي عالى وقادر على تطوير نفسه + انترنت + امكانية اتخاذ القرار = التحكم الكامل فى العالم وفى البشرية
